Ugrás a tartalomhoz Lépj a menübe
 


Arkivo de la novaĵservo Ret-Info, 2009.10.

 

- Retpoŝta novaĵservo kun selektitaj E-novaĵoj: RET-INFO -
- Aliĝoj kaj malaliĝoj ĉe: http://www.eventoj.hu -
- Se vi ie citas /represas /plusendas mesaĝon el nia servo,
bonvolu mencii ankaŭ la fonton "Ret-Info" ĉe http://www.eventoj.hu !

 

==========================================================

==========================================================

 

2010.10.30. – BELARTAJ KONKURSOJ DE UEA EN 2010


La gvida Esperanta artkonkurso, la Belartaj Konkursoj de UEA, invitas partoprenantojn por la 61-a fojo. La rezultojn oni anoncos en la 95-a Universala Kongreso en Havano. Partopreno estas libera al ĉiuj kaj ne ligita al partopreno en la UK. La konkursaĵoj devas esti neniam antaŭe publikigitaj en ajna formo, escepte de infanlibroj. Oni rajtas sendi maksimume tri konkursaĵojn por sama branĉo. Validas krome la jenaj kondiĉoj:


Poezio: maksimuma longo ne fiksita;

Prozo: maksimuma longo 200 x 65 karaktroj (kvino da paĝoj);

Teatraĵoj: maksimuma longo ne fiksita;

Eseo: teme ligita kun Esperanto aŭ kun la kongresa temo "Interproksimigo de kulturoj", proksimuma longo 400 x 65 karaktroj (deko da paĝoj); la unua premio nomiĝas "Luigi Minnaja";

Infanlibro de la Jaro: originala aŭ tradukita libro por infanoj presforme aperinta en 2009. Unu premio.

Filmo kaj Kanto: ĉi-foje, eksperimente, la juĝantaroj mem elserĉos premiindajn verkojn.

Ĉiujn konkursaĵojn – en unu ekzemplero, escepte de tiuj por la branĉo Infanlibro – oni devas sendi al Belartaj Konkursoj de UEA, ĉe Michela Lipari, viale Giulio Cesare 223, IT-00192 Roma, Italio, aŭ prefere rete al la adreso: michela.lipari@tiscali.it, indikante pseŭdonimon por gardi la anonimecon de la aŭtoro.

Premioj: unua premio 240 eŭroj, dua premio 168 eŭroj, tria premio 96 eŭroj; Nova Talento 168 eŭroj; Infanlibro de la Jaro 504 eŭroj.

Detala regularo haveblas ĉe UEA, kaj legeblas ankaŭ ĉe http://uea.org/dokumentoj/belartaj_konkursoj_regularo.html .

 

gk de UEA

==========================================================

 

2009.10.29. – La retejo El popola Ĉinio serĉas eksterlandan redaktoron

 

Ĉina Esperanta Ligo serĉas alilandan eksperton (trudukiston/redaktoron) por la reta revuo "El Popola Ĉinio".

 

La retejo "El Popola Ĉinio" (vidu http://www.espero.com.cn ) estas Esperanta retejo, kiu dissendas informojn pri socio, kulturo kaj ekonomio de Ĉinio kaj ankaŭ pri la Esperanto-movado.

Por disvolvo de la retejo, la redakcio serĉas alilandan esperantistan redaktoron, kiu havos la taskon redakti kaj lingvopoluri artikolojn de la retejo.

Kondiĉoj por kanditatiĝi al la posteno estas, ke li aŭ ŝi devas esti malpli ol 50-jara, havi klerecon de supera lernejo, posedi relative altan nivelon de Esperanto, esti sperta en redaktado kaj koni la ĉinan kulturon. Aparte bonvena estas tiu, kiu profesie okupiĝas pri historio, sociologio kaj literaturo.

Kiu interesiĝas pri la posteno, bonvolu sendi sinproponon inkluzivantan la nomon, sekson, aĝon, ŝtatanecon, loĝ-lokon, intereso-sferon, profesio(j)n, esperantistan karieron, edukan diplomon, kaj esperantajn verkojn al nia retpoŝto: "elpc@china.com" kaj "chenji99@yahoo.com.cn"

Por eventualaj demandoj pri aliaj detaloj nia telefono estas : +86-10-68995930


-----

fonto: Ret-Info
http://www.eventoj.hu

 

==========================================================

 

2009.10.27. – Kontribuu per subtekstoj!

 

Espereble vi jam scias pri ekzisto de la retejo: http://www.filmoj.net (Verda Filmejo).


Kun subteno de Rusia Esperantista Junulara movado mi kreis blogon por kolekti kiel eble plej multe da filmoj kun subtekstoj en Esperanto kaj eble poste dubli ilin.

Mi ŝatus inviti listanojn kontribui al la komuna afero por prezenti viajn tradukojn de subtekstoj, prezenti vian kulturon per viaj naciaj filmoj.

Post iom da tempo komenciĝos laboro por kompili modernan priskribon kiel krei kaj traduki subtekstojn ( http://filmoj.net/subtekstejo ) en dokuWiki, kie ĉiu povas kontribui per utilaj informoj.

Se vi ŝatus skribi pri filmarto ni donos al vi tiun eblon en Verda Filmejo.

Donacu subtekstojn kaj disdividu emociojn kun la tuta mondo!

Kreante la mondon ĉirkaŭe,

Aleksander Osincev

el [esperantisti-italiani]

 

-----
fonto: Ret-Info
http://www.eventoj.hu


==========================================================

 

2009.10.24. – Amasa aliĝo al la junulara silvestra aranĝo 'JES'

Anstataŭ la ĝisnunaj apartaj junularaj aranĝoj (IS en Germanio, kaj AS en Pollando) ĉi jare estas organizata komuna jarfina junulara festo en Zakopane kun la nomo "Junulara Esperanto-Semajno, JES". La ĉefan organizadon faros la E-klubo "Varsovia vento" kun la gvido de Irek Bobrzak (viavento@onet.eu), sed helpos lin la landaj kunordigantoj Łukasz Żebrowski (AS-PL) kaj Julia Hell (IS-DE).

En la pasintaj semajnoj ekfluis torento de aliĝoj. Fakte, la retpaĝo de JES montris "nur" 100 aliĝintojn la 6-an de oktobro. Certe pro la proksimiĝo de kotiz-altiĝa limdato oni amase aliĝis, tiel ke la nombro de aliĝintoj superis 150 la 14-an de oktobro, kaj 190 la 17-an.

Pro tio, ne plu estas havebla lito en la tiel nomataj "luksegaj ĉambroj".

Inter la aliĝintoj 42 venas el Pollando, 28 venas el Rusio, 28 el Ukrainio, 18 el Germanio, kaj 17 el Francio.

Retpaĝo de Jarfina Esperanto-Semajno kun informoj kaj aliĝilo: http://jes.pej.pl

laŭ tejo.org

-----
fonto: Ret-Info
http://www.eventoj.hu

==========================================================

 

2009.10.22. – Unua teatraĵo en Serbio


Pasintsemajne en la teatro "Joahim Vujiĉ" en urbo Kragujevac okazis por Serbia Esperanto-movado - historia okazaĵo: la unua profesia teatra spektaklo en Esperanto.

Aktoris la skipo internacia (profesia teatra Sceno Shelter): Saŝa Pilipoviĉ (Aleksandar Postnikov), aktoro de kragujevaca teatro, Miĉo Vrhovac (L. L. Zamenhof), esperantisto el Banja Luka (BiH) kaj Ljubica Gaŝpareviĉ (Lidija), aktorino ankaŭ de kragujevaca teatro "Joahim Vujiĉ". Enscenigisto estis Miliĉ Jovanovic, membro de grupo Shelter-Sceno.

La teatra salonego estis plena. Organizantoj preparis simultanan tradukaĵon por neesperantistoj. La spektaklo estis parto de solena fina vespero de Internacia Festivalo de Malgrandaj Scenoj kiun partoprenis teatroj el Serbio, Britio, Romanio, Usono, Italio kaj Makedonio.

Al la teatra spektaklo, la unua profesia spektaĵo en Esperanto en Serbio, krom la civitanoj de Kragujevac kaj partoprenantoj de festivalo el aliaj landoj, ĉeestis ankaŭ beogradaj kaj kragujevacaj esperantistoj.

Dimitrije Janicic
dimjan@sbb.co.yu

el [landa-agado]

-----
fonto: Ret-Info

==========================================================

 

2009.10.20. – Informletero de Vinilkosmo - pri aktualaj Esperanto-muzikoj
n-ro 25 - oktobro 2009 -

Estimata muzikŝatanto,

Ho ne! Ne pensu, ke Vinilkosmo malaperis, for la ideon pri tio! Se la novaĵoj iĝas maloftaj kaj ke oni devus paroli pri jara informletero, kulpis pri tiom longa silento la amasego da laboro plenumita dum tiu tempo....

Unue, kaj tio estas la granda novaĵo, laŭ la peto de multenombraj interretuloj kaj ankaŭ de artistoj, la MP3- kaj OGG-versioj por laŭleĝa kaj tuja elŝutado de kreskanta nombro de albumoj el nia katalogo estas jam disponeblaj en nia tiucela elŝutretejo, Vinilkosmo-mp3.com. Legu kelkajn klarigojn ĉi-sube atendante vian viziton kaj elŝutojn, kompreneble!

Tiu grandega laboro tute ne bremsis la produktadon nek la distribuadon de tiuj objektoj tuŝeblaj kaj enmanigeblaj kio estas la KD-oj (Ko-Diskoj), DVD-oj (Do-Vo-Doj) kaj aliaj fizikaj sonportiloj, ne malpli ol sep novaj albumoj, inter kiuj unu DVD celanta la varbadon de Esperanto al tiuj kiuj ankoraŭ ne parolas tiun lingvon... sed certe poste tion faros!

Notindas ke reveno de Ĵomart kaj Nataŝa kun nova albumo produktita de ilia propra eldonejo "ĴomArt's Studio", kaj la unua albumo de ilia filino, Carina, kiu certe garantios la posteularon de tiu dinastio naskiĝanta.

Kaj Tiel Plu kaj Espo-Despo (pasinte kaj parte Esperanto-Desperado), estas en la ĉefpaĝo de tiu ĉi letero pro po unu nova albumo. Tiu de Espo-Despo estas ankaŭ nova teknika sperto kiun ni invitas vin malkovri.

Kaj Kapriol kaj Tone, du novaj talentoj agnoskitaj kun la apero de iliaj unuaj albumoj, sed certe ne iliaj lastaj....

Dezirante al vi bonan esploradon de ĉiuj tiuj muziknovaĵoj, dankon al ĉiuj pro via pacienco kiun ni esperas rekompenci kiel eble plej bone per ĉi tiu nova numero!

Nia kompleta katalogo ĉe: http://www.vinilkosmo.com

<><><><><><><><><><><><><><><><><><><><><><><><><><><>
<><>

Vinilkosmo-Novaĵoj

vkkd 94 " Collection JomArtajoj - 'La ruĝa albumo' "

ĴOMART KAJ NATAŜA

Ĵomart kaj Nataŝa estas duopo kiu komencis kanti en Esperanto en 1987 en Kazahio. Antaŭ tio, de 1983, Ĵomart kantis unue sola, kaj poste kun sia Esperanto-rokgrupo Kredo. La duopo devenas el Kazahio, kie ili multe vojaĝis koncertante dum diversaj E-aranĝoj. Tie ili aperigis la plej unuan en tiama Sovetio vinilan diskon 'Somera mondo' (1989). En la jaro 1991 la paro translokiĝis al Svedio kie ili eldonis tri kasedbendojn kaj 2 lumdiskojn 'Valso por amikoj' (vkkd 28) en 2000, kaj 'Amu min' (vkkd65) en 2003.

ĴomArtaĵoj - la Ruĝa albumo estas la unua KD el serio de tri planataj. Ĝi celas reludon kaj rekantadon de ĉiuj iliaj plej ŝatataj kantoj iam registritaj el jam elĉerpitaj kasedoj kaj KD-oj. La plejparto de la kantoj sur ĉi tiu kaj planataj albumoj estos malnovaj, bone konataj kaj ŝatataj. Kelkaj kantoj ŝanĝiĝis survoje, ja ili kantas ilin jam dum pli ol 20 jaroj!

Kompreneble la aranĝoj de la kantoj estas pli moderna kaj pli riĉa ol antaŭe. La registrado estas pure akustika kaj la intenco estas krei la saman varman kaj intiman etoson kiun oni sentas dum iliaj koncertoj. Jen do remalkovru, aŭskultu, kaj ĝuu la unuan KD-on de la kolekto!

Por aŭskulti fragmentojn aŭ rekte elŝuti :
JomaArtajoj - La ruga albumo
http://www.vinilkosmo-mp3.com/jhomartajhoj-rugha-albumo-c-76_133_137.html?language=eo

Por rekte mendi la diskon:
http://www.vinilkosmo.com//?disc=vkkd94&lng=e

<><><><><><><><><><><><><><><><><><><><><><><><><><><><><>

VKKD 95 " Aventur' " - KAPRIOL'

La unua albumo de Kapriol'! aperis okaze de ilia 3-a koncerto por KEF (Danio). La frisa bando Kapriol'! (Nederlando) estiĝis spontane dum balfolkaj (popolbalaj) vesperoj. La muzikistoj de la muzikgrupo jam ludis sur multaj festaj scenejoj. Marita kaj Marian ludis dum longaj jaroj en la Esperanto-grupo Kajto, kaj nun ili prezentiĝas en la duopo Marianta (flutoj, akordiono, kanto). Ad kaj Rutger jam abunde meritis siajn spronojn en la bandoj Blue Tape Band, 60/60 (Ad), Kalis kaj Sjock (Rutger).

Kvarope ili formas la novan grupon Kapriol'! kiu prezentas svingan kaj varian programon kun balfolkaj (popolbalaj) dancmelodioj kaj kantoj, kiuj fontas el tradiciaj repertuaroj nederlandaj aŭ memfaritaj. Koncize dirite, ili ludas kaj malnovan muzikon per novaj muzikiloj kaj memfaritan muzikon per malnovaj muzikiloj. Ĉion ili kombinas kun bela plurvoĉa kantado kaj plurkoloraj aranĝoj. Krom tio, improvizaĵo estas grava parto.
Ilia balfolka (popolbala) repertuaro konsistas el tradiciaj dancoj, skotiŝoj, polkoj, valsoj kaj mazurkoj, sed ankaŭ el viglaj dancoj kiaj bureo kaj andro, aŭ ankaŭ ronddancoj kiel la cirklo kaj la ĵigo, en kiuj la partneroj daŭre interŝanĝiĝas.

Por aŭskulti fragmentojn aŭ rekte elŝuti: Aventur'
http://www.vinilkosmo-mp3.com/aventur-c-76_132_138.html?language=eo

Por rekte mendi la diskon :
http://www.vinilkosmo.com//?disc=vkkd95&lng=e

<><><><><><><><><><><><><><><><><><><><><><><><><><><><><>

VKKD 96 " Carina kantas por vi en Esperanto "

Ne tiom multnombras albumoj de porinfanaj kantoj en Esperanto. Tial la KD de Carina konsistas el kantoj registritaj de kiam ŝi estis ege juna ĝis 2009.

Carina komencis kanti Esperante kiam ŝi estis 3-jara. La unuan fojon ŝi kantis de la scenejo antaŭ 400 partoprenantoj de la 3-a Azia Kongreso en Seulo (2002) kiam ŝi estis 6-jara. La plej unua kanto, "Vojo al Luno", estis registrita en 2002, kaj aliaj kantoj sinsekve laŭ ilia apero. Tial la temoj, melodioj, kaj etoso de la kantoj estis elpensitaj kaj adaptitaj por preskaŭ ĉiu infanaĝo - de la malgrandaj infanoj ĝis adoleskantoj, ja Carina kreskis dumtempe. Kelkaj el la plej fruaj kantoj estis tradukitaj, sed plejparte estas origine verkitaj. Ĉiuj 10 kantoj estis aranĝitaj de Ĵomart kaj registritaj ĉe JomArt's Studio en Stokholmo. La KD ne estas nur por infanoj kaj iliaj gepatroj, sed por ĉiuj kiuj ŝatas bonan muzikon!

Por aŭskulti fragmentojn aŭ rekte elŝuti :
Carina kantas por vi en Esperanto
http://www.vinilkosmo-mp3.com/carina-kantas-Esperanto-c-74_134_139.html?language=eo

Por rekte mendi la diskon :
http://www.vinilkosmo.com//?disc=vkkd96&lng=e

<><><><><><><><><><><><><><><><><><><><><><><><><><><><><>

VKKD 97 " Esperante "
ESPO DESPO

Jen 'Esperante', la nova albumo de Espo Despo - mallongigo de la nova vizaĝo de la bando Esperanto-Desperado, vidu en la katalogo la albumojn BroKantaĵoj (Vkkd 34) kaj Hotel Desperado (Vkkd 72).

Tiu ĉi albumo estas frukto de preskaŭ trijara eksperimentado de sonoj, ritmoj, tekstoj, kaj melodioj. Kvar amikoj, Amir, Karl, kaj Laurent, plifortigitaj iom poste de Andrzej, membroj de la nova konsisto de Espo Despo, preparis la KD-on ekde fino de 2005, malrapide sed persiste kaj entuziasme. Ili faris plurajn versiojn de ĉiu kanto, antaŭ ol la aranĝoj, registrado, miksado, kaj mastrigado finiĝis - kaj nur post kiam la rezulto atingis kontentigan kvaliton por ĉiuj. Tio klarigas la longdaŭran preparadon de la albumo kiu estis realigita per atento, plezuro, sopiro, amo, kaj espero.

La tekstoj de la kantoj priskribas temojn kiaj la vivo kaj amo, homaj eraroj, senespero, mondmizero, ĝuo kaj sufero, perdo kaj trovo, milita sensenco kaj sensento, destino kaj libereco, steloj kaj maroj, dilemoj kaj homa espero.
Tekstojn de pluraj aŭtoroj estis uzitaj, inter alie poemoj de klasikuloj kiel Adam Mickiewicz, Nikolai Kurzens, kaj Poul Thorsen. Muzike, la kantoj estas diversstilaj: mondmuziko de afro-eŭropa origino kun elementoj de popo, roko, foje eĉ jazo.

Uzante originalajn muzikideojn, altkvalitajn tekstojn, kaj sugestivajn voĉojn, la kvar despoanoj sukcesis unuigi genran diversecon en sia propra, originala stilo.

Pluraj gast-artistoj apogis la muzikverkon, inter kiuj Alejandro Cossavella (Ale) kaj Jean-Marc Leclercq (JoMo), kiuj registris sian belegan voĉon en po unu kanto. Krome, audeblas ankaŭ belegaj sonoj de trumpeto de David-Emil Wickström, akordiono de Emir Bosnjak, kaj gitaro de Dino Pehilj.

Kaj premiero por Esperanto-artisto: la albumo estis eldonita interrete tra elŝut-retejoj kaj sen muzikproduktejo. La fizika albumo estas presita malgrandkvante de la bando mem kaj distribuata per la Vinilkosmo-katalogo.

Por aŭskulti fragmentojn aŭ rekte elŝuti :
Esperante
http://www.vinilkosmo-mp3.com/esperante-c-74_135_140.html?language=eo

Por rekte mendi la diskon :
http://www.vinilkosmo.com//?disc=vkkd97&lng=e

<><><><><><><><><><><><><><><><><><><><><><><><><><><><><>

VKKD 98 " Repe, Ritme , Sone... "
TONE

La brazila artisto Tone (Antonio Moreira Filho) el San Paŭlo ekkonatiĝis en brazilaj aranĝoj kaj kongresoj ekde la jaro 2005-2006 per la furora "Nova kanto".

Tone estas talenta aŭtoro de repaj tekstoj kiuj esprimas lian ĉarmon pri la vivo pere de la esperanta lingvo laŭ bonegaj ritmaj repaj sonbatoj fare de brazilaj muzik-kunlaborantoj (Slim Rimografia, Dĵ Nato, kaj eĉ la bando NhôCuné).

Post longa laborado kaj strebado Tone finpreparis tiun ĉi 7-titolan albumeton por eŭropa turneo dum la somero 2009 kun koncertoj en KEF en Danio, IJK en Ĉeĥio, UK en Pollando kaj FESTO en Germanio.

Repe, ritme, sone estas la nomo de tiu unua hiphopa verko de Tone. La KD aperis al la publiko en julio ĝuste dum la Kultura Esperanta Festivalo - KEF 2009, en Helsingor, Danio.

Laŭdo al Esperanto, valorigado de la "ni", danco, paco, kaj amo estas temoj prezentataj en tiu laboro.
Tone invitas nin pensi pri ni mem. Ni devas estis ĉiam la kerno de ĉio. Ni estas pli ol io ajn. Ni, la homoj, estas la ĉefa afero en la mondo. Nenio estas pli grava ol ni mem kaj nia kara planedo Tero.

Por aŭskulti fragmentojn aŭ rekte elŝuti :
Repe, Ritme, Sone...
http://www.vinilkosmo-mp3.com/repe-ritme-sone-c-74_136_141.html?language=eo

Por rekte mendi la diskon :
http://www.vinilkosmo.com//?disc=vkkd98&lng=e

<><><><><><><><><><><><><><><><><><><><><><><><><><><><><>

VKKD 99 " Surplacen Venu Vi "
KAJ TIEL PLU

Post "Sojle de la klara temp'" vkkd 32 (2001) kaj "Plaĉas al mi" vkkd 74 (2004), la kataluna bando Kaj Tiel Plu daŭre proponas vojaĝon tra la muzikoj de la mezepoko kaj de la tradicioj kataluna, okcitana kaj sefarda. Krome, reaperis la originala spirito de la bando kiu en sia komenco trinkis el internacia repertuaro, kaj proponas ankaŭ kantojn kaj dancojn el Kroatio, Kabilio, Danio kaj Anglio.

La unua disko estis pli mezepoka, la dua estis pli tradicia. "Surplacen venu vi" estas pli direktata al dancmuziko kaj montras maturiĝon de la bando, kiu prezentas kantojn kaj dancojn per tre bunta kaj riĉa muzikilaro kiel gitaro, mandolino, kontrabaso, violono, flutoj, gambovjolo, akordiono, diversaj perkutiloj, koruso kaj ĉefa melodia voĉo.
La kantoj, tradukitaj al Esperanto, tute ne perfidas ties originalajn lingvojn. La libreto prezentas kaj la kantatan esperantaĵon kaj la kanton en la originala lingvo (okcitana, kataluna, judhispana, kroata, amaziga kaj hispana), sed male, utilas al diskonigo de la diversaj tradicioj, kaj atingas la korojn de tre diverspeca publiko.

Kiel en la duaj antaŭaj albumoj, la disko komenciĝas per mezepoka melodio kaj finas per tradicia kanto de la hispana civila milito.

Tiu KD inkluzivas 10 instrumentajn versiojn de la kantoj por karaokeo kaj videon pri la bando en la studio.

Por aŭskulti fragmentojn aŭ rekte elŝuti :
Surplacen venu vi
http://www.vinilkosmo-mp3.com/surplacen-venu-c-76_102_142.html?language=eo

Por rekte mendi la diskon :
http://www.vinilkosmo.com//?disc=vkkd99&lng=e

<><><><><><><><><><><><><><><><><><><><><><><><><><><><><>

VKDV D1 " Esperanto estas ... "

La DVD "Esperanto estas..." estas aktuala informfilmo pri Esperanto direktata al la ne-Esperanta publiko. La ĉefa celo estas prezenti Esperanton de interne, vivantan, modernan kaj plene funkciantan kiel internacia lingvo kun multnombraj facetoj kaj karakterizoj.

Ĉiu el la 6 partoj de la filmo montras diversan aspekton de la lingvo.

La originala versio estas en Esperanto.

Sume la dublaĵoj de la voĉoj en la filmo estas en 6 diversaj lingvoj kaj en 20 subtekstigitaj !

Jen filmo kiu evitos al homoj fari la stultan demandon: ĉu Esperanto estas parolata? , aŭ, ĉu ĝi havas kulturon? , kiu parolas ĝin kaj kie? , ktp.

Nepre havinda en sia videoteko por ĉion scii pri Esperanto!

Por aŭskulti fragmenton aŭ rekte mendi :
http://www.vinilkosmo.com//?disc=vkdvd1&lng=e

<><><><><><><><><><><><><><><><><><><><><><><><><><><><><>

Vinilkosmo-mp3.com lanĉiĝis oficiale ekde julio!

Post longega preparado, finfine ni havas la plezuron anonci al vi ke ni malfermas publike novan retejon (MP3 kaj OGG-servo) komplementan al la jam konata 'www.vinilkosmo.com' kaj kiu ebligos al vi akiri laŭleĝe per elŝutado Esperanto-muzikaĵojn.

La retejo evoluos en la venontaj monatoj, ĉar momente nur la kategorioj "Popo - Roko - Hiphipo - Elektronik" kaj "Kanzono - Tradicia" estas provizitaj per la eldonitaj albumoj de Vinilkosmo.

Sekve la ceteraj albumoj de la katalogo de Vinilkosmo estos iom post iom aldonitaj laŭ la interkonsentoj kun la artistoj.

Ankaŭ virtualaj albumoj neeldonitaj estas en preparado por ilia baldaŭa enretigo ("JoMo kantas Mayoma-n" kaj "Eterne Rima"), kaj estas planataj enretigo de malnovaj kasedalbumoj kiel ekzemple "62 minutoj" de Persone.

Ni invitas vin viziti kaj malkovri tiun ĉi novan servon de Vinilkosmo, kaj antaŭ ĉio por bone kompreni kiel funkcias la MP3-servo bonvolu legi la "Helpkonsilojn" en la maldekstra menuo malsupre ĉe "Informoj".

Ni esperas, ke ĉi tiu nova retejo plaĉos al vi kaj ke vi venos ofte viziti ĝin kaj sekvi kiel ĝi evoluas, kaj malkovri la albumojn (aŭskultado de ĉiuj muzikaĵoj) kiu ankaŭ povas esti utila por elekti kaj aĉeti la KDojn ĉe Vinilkosmo.com.

Notu bone la adreson : http://www.vinilkosmo-mp3.com.

Bonan viziton!

<><><><><><><><><><><><><><><><><><><><><><><><><><><><><>

Vi povas amplekse disvastigi tiun ĉi informleteron.
Dankon pro via atento. Plej muzikajn salutojn al ĉiuj legantoj !

Redaktita por vi de

Floréal Martorell
kaj Mark Eaton

-----
fonto: Ret-Info
http://www.eventoj.hu

==========================================================

 

2009.10.17. – Germana Fondaĵo de Familio Fischer (FFF) invitas familiojn

Kép Ekde 2008 ekzistas la Fondaĵo de Familio Fischer (FFF) en Germanio. Ĝi havas du diversajn celojn, nome unue, finance subteni oficejon de Germana Esperanto-Asocio, kaj due, ebligi al subtenindaj familioj partoprenon en Esperanto-aranĝo de Germana Esperanto-Asocio. Prezidantoj de la fondaĵo estas d-ro Rudolf Fischer (por la unua celo) kaj s-ino Hedwig Fischer (por la dua celo).

FFF nun alvokas subtenindajn familiojn, kandidatiĝi por la partopreno en la 26-a Printempa Semajno Internacia, de la 2-a ĝis la 9-a de aprilo en 2010 (dum pasko), en Sankt Andreasberg, montaro Harz, vidu http://www.esperanto.de/psi/

Kiel "familio" validas ĉiu grupeto de plenkreskuloj respondecaj por akompanantaj infanoj aŭ junuloj. Ĉiuj subtenatoj devas esti esperantistoj, t.e. paroli Esperanton aŭ voli lerni ĝin dum la aranĝo. La familio estas subteninda, se ĝi sen la subvencio ne povus pagi la partoprenon. La subvencio povas ampleksi parton aŭ la tuton de la partoprenkotizoj inkluzive loĝadon kaj manĝojn, sed ne kovras la vojaĝkostojn kaj poŝmonon.

Kandidatoj ekster Germanio bezonas rekomendon de sia nacia Esperanto-organizo. Loĝantoj de Germanio estu ordinaraj membroj de Germana Esperanto-Asocio aŭ Germana Esperanto-Junularo. Pliajn detalojn fiksos la prezidanto de la fondaĵo kun la kandidatoj individue laŭ la aktuala situacio. Ĝi rezervas al si la rajton malakcepti subvencipetojn sen la devo klarigi tion.

Sinproponojn oni direktu al la prezidanto de FFF:

s-ino Hedwig Fischer,
Gustav-Adolf-Str. 2a, DE-48356 Nordwalde, Germanio.
fischerh@uni-muenster.de

-----
fonto: Ret-Info
http://www.eventoj.hu

==========================================================

 

2009.10.16. – 120.000 artikoloj en la Esperanto-vikipedio

Kép Hieraŭ vespere, la 15-an de oktobro, la Esperanto-vikipedio atingis 120.000 artikolojn. Nia vikipedio laŭ la nombro de artikoloj nun staras en la 21-a loko inter la
diverslingvaj versioj; la volapukan version oni preterpasis antaŭ kelkaj semajnoj, la 22-an de septembro. La 120.000-a artikolo temas pri São Bento do Trairí, eta urbo en norda Brazilo.

Ĉiutage ĉ. 160.000 vizitoj de homoj

La Esperanto-vikipedio ricevas tage ĉ. 160.000 vizitojn de homoj (do sen robotoj). Per tio la Esperanto-vikipedio en aŭgusto okupis la 33-an lokon - iom post la greka kaj slovaka, iom antaŭ la litova kaj serba versioj.

Graveco de la vikipedio

La Esperanto-vikipedio havas pluroblan utilon por la Esperanto-komunu
mo. Unue ĝi servas kiel leksikono - fakte la unua ĝenerala leksikono dum la ĝisnuna 122-jara historio de Esperantujo. Due per tio ĝi subtenas ankaŭ la terminologian diskutadon kaj laboron. Trie nia vikipedio tre klare montras al la ekstera mondo, ke Esperanto vivas ĉiutage kaj estas daŭre uzata. La lingvo Esperanto, antaŭ 122 jaroj la plej malgranda lingvo de la mondo, intertempe havas firman lokon inter la 50 plej gravaj lingvoj. Tio videblas krom per vikipedio ankaŭ per pluraj aliaj statistikoj kaj per la uzado en multlingvaj retejoj.

Unu kontribuo por vikipedio ĉiumonate

Por subteni la pluan konstruadon de vikipedio mi alvokas ĉiun spertan Esperanto-parolanton kontribui al la vikipedio almenaŭ per eta aldono ĉiumonate. Egalas, ĉu tio estas korekteto de artikolo aŭ redaktado, ĉu tradukado el alia vikipedio aŭ verkado de komplete nova artikolo. Ĉiu kontribuo helpas daŭrigi la grandan taskon - supozeble temas pri la plej grava verkada tasko en la historio de Esperantujo. Se ĉiuj kune helpas, ni sukcesos eĉ pli bone!

Lu Wunsch-Rolshoven,
EsperantoLand

==========================================================

 

2009.10.16. – Itinero Esperanto en pola turisma konkurso

 

En la paĝaro http://www.otowakacje.pl/konkurs/78 oni povas voĉdoni al la plej bona turisma produktaĵo de la jaro 2009. Unu el ili estas la itinero de Esperanto kaj de pluraj kulturoj en Bjalistoko, laŭ kiu povis promeni kongresanoj de la 94-a UK en Pollando.


Paĝaro de la itinero estas http://malkovru.bialystok.pl (ndlr: paĝaro en Esperanto, kaj kun laŭdinda teknika nivelo!)


Amike

Przemysław Wierzbowski
Bjalistoka Esperanto-Societo

el [polaj-esperantistoj]

-----
fonto: Ret-Info

==========================================================

 

2009.10.11. – Monto Esperanto, elvidejo Zamenhof - ekskurso en Hungario

Kép Ne estas vaste konate, ke je ĉ. 40 km-oj apud Budapeŝto, en Hungario tute oficiale ekzistas "Monto Esperanto" kaj sur ĝia pinto "Elvidejo Zamenhof". Tiuj geografiaj nomoj estas skribitaj ankaŭ en mapoj. (Vidu ekzemple: http://www.eszperanto.hu/eventoj/bildoj/z-kilato-monto-terkep.jpg )

La pasintan dimanĉon pli ol 50 esperantistoj faris ekskurson al tiu monto kaj elvidejo, organizita de "Fondaĵo Esperanto" ĉe Eventoj kaj la hungaria Junulara E-Asocio. En la ekskursa grupo estis kunlaborantoj de la E-Centro Eventoj, de Lingvo-Studio, pluraj instruistoj, kursanoj, junaj kaj netiomjunaj aktivuloj, anoj de la refondiĝinta skolta E-teamo, reprezentantoj de pluraj E-societoj, asocioj kaj instancoj, E-bibliotekoj, kaj multaj aliaj individuaj esperantistoj.


Kelkajn fotojn pri la ekskurso oni povas trovi ĉe http://kep.tar.hu/eszperanto/

La elvidejo fakte jam ne plu ekzistas, ĝi ruiniĝis. La elvidejon konstruis la loka E-grupo de urbo Vác en 1973. Dum longaj jaroj oni faris organizitan ekskurson al ĝi sub la nomo "Zamenhofa Internacia Pacmarsxo, ZIP", sed sub la kapitalisma reĝimo ĝi estis nezorgita kaj forgesita, fine ruiniĝinta. Hodiaŭ eĉ la apudaj arboj superkreskis ĝin, sed ĝi dauxre funkcias kiel Esperanta memorloko, al kiu aktivuloj de E-Centro Eventoj ĉiujare organizas esperantistan ekskurson.

La apuda monto kun 336 metra alto ricevis la nomon Esperanto en 1979 okaze de la tiama 7-a internacia "pacmarsxo" ZIP.


Szilvási László

==========================================================

 

2009.10.10. – Nobelpremiito Obama akuzata pri esperantismo


En Libera Folio aperis atentoveka artikolo. Jen la enkoduka kap-teksto:

... La kontrauxuloj de la usona prezidento Barack Obama jam de longe akuzas lin pri socialismo, naziismo, islamismo kaj planado de koncentrejoj por nekonsentantoj. Nun aperis nova akuzo: Obama ne nur estas nazio, sed li krome intencas devigi cxiujn usonanojn lerni Esperanton.

El satiraj tekstoj, mokantaj la oponantojn de Obama, la aserto rapide migris al la arsenalo de la efektivaj kontrauxuloj de la fresxa Nobel-premiito. ....

La tuta artikolo estas legebla cxe:

 

-----

fonto: Ret-Info

==========================================================

 

2009.10.09. – ESF nomumas novajn direktorojn

Esperantic Studies Foundation (ESF) ĝojas anonci la nomumon de S-ro Derek Roff (Universitato de Nov-Meksiko) kaj D-ro Geoffrey Greatrex (Universitato de Otavo) al sia Estraro.

D-ro Humphrey Tonkin, prezidanto de ESF, bonvenigis la novajn nomumitojn: “La aldono de Geoffrey kaj Derek alportos al la estraro tre bezonatan sperton en pluraj kampoj, aparte rilate konon de la Esperanto-movado: Derek aktivis en usonaj Esperantaj organizoj kaj Geoffrey en organizoj en Eŭropo, aparte en Britio. Derek alportas ankaŭ scion pri informadiko kaj pri lingvoinstruado. La akademiaj kvalifikoj de estraranoj inkluzivas instruadon, literaturon kaj lingvistikon; kiel historiisto, Geoffrey alportos malsaman kaj gravan perspektivon al nia laboro kiel financantoj de esplorado.”

Pri Derek Roff:

Derek Roff mastrumas teknologion kaj pedagogion en la Lingvo-Lerna Centro de la Universitato de Nov-Meksiko. Li laboras kun profesoroj kaj instruistoj en ilia esplorado kaj en la disvolvado kaj havebligo de teknologi-rilataj edukmaterialoj por plibonigi la lernosperton de studentoj. Li estas eksa estrarano kaj aktiva partoprenanto en la Komputil-Bazita Lingvoinstrua Konsorcio.

Liaj nuntempaj interesoj inkluzivas projekton krei DVD-on por trejnado de gestlingvaj interpretistoj, kaj antaŭenigadon de komprenado, edukado kaj pli vasta konscio pri daŭripovo kaj naturaj konstrumetodoj.

Pri Geoffrey Greatrex:

Geoffrey Greatrex estas profesoro en la fako de klasikaj kaj religiaj studoj en la universitato de Otavo, Kanado, kie li instruas ekde 2001. Ricevinte diplomojn de magistro pri artoj kaj doktoro pri filozofio de la universitato de Oksfordo, en Britio, li laboris, ekde 1994, en la “Malferma Universitato” (Anglio), la Universitato de Kimrio (Kardifo) kaj la Universitato Dalhousie (Halifakso, Nov-Skotio). Li membras en pluraj redakciaj estraroj, kiel ekzemple Millennium kaj Byzantinische Zeitschrift, kaj li ankaŭ servis kiel prezidanto kaj de la Brita kaj de la Kanada Esperanto-asocioj.

Por pli da informoj pri la temoj de tiu ĉi gazetara komuniko, bv. kontakti ESF retpoŝte ĉe admin@esperantic.org.

– la 6-an de oktobro en 2009 –

-----
fonto: Ret-Info
       http://www.eventoj.hu

==========================================================

 

2009.10.08. – Nova librokatalogo de Retbutiko


Aperis nova katalogo de la internacia libroservo "Retbutiko" kun 50 paĝoj da interesaj informoj.

Jen la ĉefaj ĉapitroj:

* Prozo / * Poezio
* Noveloj - Rakontoj
* Por infanoj
* Por komencantoj
* Ekonomio
* Historio
* Scienco
* Esperantologio
* Vortaroj / * Kursoj
* e-libroj
* ktp ktp

La katalogo estas senpage elŝutebla ĉe: http://retbutiko.esperanto.be

-----
fonto: Ret-Info

 

==========================================================

 

2009.07.31. – La filma oferto de UEA plivastiĝis


La 6-an de oktobro aperis la 5-a numero de la filmĵurnalo UEA-viva kun tri eroj. Unue Emilio Cid raportas pri la rezultoj de la informkampanjo ĉirkaŭ la 94-a UK en Bjalistoko, al kiu li alvokis laŭ komisio de la Estraro de UEA en la filmĵurnalo en majo. Cid estas sufiĉe kontenta pri la rezultoj kaj instigas plu daŭrigi la agadon ankaŭ nun, kiam la UK jam apartenas al pasinteco. En la dua ero, pruntita el la televida servo de UN, oni vidas elpaŝon pri lingvaj rajtoj fare de la UEA-reprezentanto Mireille Grosjean ĉe la Homrajta Konsilio de UN fine de septembro. La fina parto estas dediĉita al TEJO. Oni vidas sinprezenton de la nova Estraro de la junulara sekcico de UEA en la ĵusa ARKONES en Poznano, Pollando.

La reta kinejo de UEA ĉe Ipernity pliriĉiĝis per valoraj historiaj dokumentoj. La filmo "Lingvo festis naskiĝtagon" de Michael Cwik raportas pri la impona UK de la Jubilea Jaro 1987 en Varsovio. Scenojn el la Budapeŝta UK en 1966, i.a. kun fragmento el la festparolado de Ivo Lapenna, montras la filmo "Esperanto-fonto", kiu unuavice rakontas pri la eventoplena historio de nekutima ZEO apud la hungara ĉefurbo. La plej lasta el la novaĵoj en la reta kinejo estas samtempe la plej malnova el ili, nome dokumenta filmo pri la 48-a UK en Sofio en 1963. Ĉiuj ĉi trezoraĵoj devenas el la Biblioteko Hodler, kies filmojn UEA iom post iiom ciferecigas por pli facile disponebligi ilin al la movada publiko.

La adreso de la reta filmĵurnalo en YouTube estas http://www.youtube.com/user/UEAviva kaj tiu de la reta kinejo en Ipernity http://www.ipernity.com/home/97850.

laŭ [gk de UEA]

-----
fonto: Ret-Info
http://www.eventoj.hu
 

==========================================================

 

 

 

 

 

 

 

 

 

.